(( أولاً )) .. الورق الى بتحتاجه وانت رايح تحدد ميعاد القدرات
** ـــــــــــــــــــــــــــــــــــــــــــــــ **
ياشباب عاوز اعرفكوا ان اختبار القدرات دا هوا تانى اختبار لك من اختباراتك فى كليه الشرطه .. بعد أول اختبار ( المقاس والقوام ) وبعد مانتيجته بتظهر بتروح فى اى يوم لكليه الشرطه علشان تملى ورقتين طلب الالتحاق وتحدد الميعاد الى هاتروح تختبر فيه القدرات
وفى اليوم دا بتحتاج كالتالى :
1 : - الأول طبعاً بطاقتك الشخصيه , بطاقه التردد التابعه للكليه :
( ودول دايماً فى جيبك علشان بتدخل بيهم الكليه ) .
2 : - ورقتين طلب الالتحاق :
( ودول ورقتين موجودين معاك فى الملف الى انت اشتريته , دور فى الملف بتاعك هتلاقيهم الى مكتوب عليهم طلب الالتحاق , ومطلوب منك فيهم بيانات عنك وعن أهلك أبوك وأمك وأخواتك , والورقه التانيه بيانات عن أعمامك وخيلانك , وجدك من الأب وجدك من الأم
" واى اسم مطلوب منك فى الورقتين دول تكتبه اسم رباعى
الوظيفه او العمل تكتبها تفصيليا "
وتملاهم وانت فى البيت قبل ماتروح تحدد القدرات ولو حاجه واقفه عليك فيهم سيبها زى ماهى لما تروح هنـاك تبقى تسأل الظابط هايقولك بالظبط تعمل ايه فيها ) .
3 : - 3 صور شخصيه لك :
( ودى زى الصور الى اخدتها معاك المره الأولى وقت اختبار القوام , هاتحتاج منهم صورتين بس هاتحط واحده فى ورقه طلب الالتحاق والتانيه فى بطاقه اختبار الالقدرات والى هايسلمهوها لك هنـاك ) .
4 : - شهاده الثانويه العامه بتاعتك أو بيان النجاح :
( ودى مش هايدبسوها ولا حاجه , بس هايحتاج يشوفها علشان يقولك اثبتلى انك فى ثانويه عامه وان البيانات الى كاتبها عن درجاتك صح , وبيرخموا لو انت ناسيها هايرجعك المشوار تانى ويقولك ارجع هاتها وابقى تعالا تانى , وعادى الصوره أو الأصل ) .
5 : - شهادات أو ما يثبت مؤهل والدك ووالدتك :
( بردو كاثبات ومش هايدبس حاجه منهم لكن هايقولك وريهم لى علشان يتأكد من مؤهل الوالد او الوالده الى كاتبتهم فى ورقه طلب الالتحاق , ولو مافيش مؤهلات عادى مش هايطلب منك حاجه , بس لو كاتب مؤهل لأبوك او امك ومش جايب شهاده تثبته ممكن بردو يرجعك المشورا ويقولك ماتجليش الا بيهم , وبردو عادى الصوره أو الأصل ) .
6 : - لو انت مقيد فى كليه ( أولى كليه ) هايطلب منك اثبات قيد فيها لكن مش اشكال اثبات القيد خد معاك الكارنيه بتاع كليتك لما يقولك قله مش معايا دلوقت اثبات القيد بس معايا كارنيه الكليه , وعادى هايشوفه بردو بس كاثبات ) .
7 : - رقم ملفك يكون معاك , ورقمك القومى , والرقم القومى لوالدك ووالدتك , لو لسه هاتكمل بياناتك فى ورقتين الطلب هنـاك علشان هاتحتاجهم فيه .
** ـــــــــــــــــــــــــــــــــــــــــــــــ **
(( ثانياً )) .. الى هاتعمله فى الكليه لما تروح تحدد ميعاد القدرات
** ـــــــــــــــــــــــــــــــــــــــــــــــ **
تمام لما تجهز ورقك بعد مانتيجت اختبار المقاس والقوام لك ظهرت لائق .. تروح بقى ع كليه الشرطه , وتروح ع طول على لجنتك
وتقولهم انك عاوز تحدد ميعاد للقدرات , هاتقف صف مع زمايلك , وهايخدوا منكوا كارت التردد علشان يعمل تحريات جوا ع الكمبيوتر ويحددلك ميعادك
* وهايوزعوا عليكوا ورقه طلب القدرات وهايقولك املاها
بيكون مطلوب فيها بيانات عنك زى اسمك ورقمك القومى وتاريخ وجهه ظهور البطاقه بتاعتك ورقم ملفك ونوع الثانويه بتاعتك وتاريخ ميلادك
ومجموع درجاتك فى الثانويه ونسبتك فى الثانويه ورقم لجنتك , وهاتحط صوره من الصورتين الى مطلوبين منك ف اليوم دا فى الورق دى , والصوره التانيه فى ورقه طلب الالتحاق ...
* تمام بقى لما تملى بياناتك فى طلب اختبار القدرات وتكون مليت بياناتك فى ورقتين طلب الالتحاق , وتدبس الصوتين بتوعك واحده فى كارت اختبار القدرات الى وزعوه عليكوا , والتانيه فى ورقه طلب الالتحاق وتدبس ال 3 ورقات " 2 بتوع طلب الالحاق وكارت القدرات " تدبسهم مع بعض
( واى حاجه واقفه عليك فى ملئهم أو مش متأكد منها .. سيبها لما تدخل لجنتك تسأل فيها الظابط تعمل فيها ايه بالظبط )
* بعدين هاتدخلوا انت والمجموعه الى معاك للجنتك تقعدوا ع الكراسى وتستنوا ينادى الظابط ع واحد واحد بكارت التردد الى هوا اخده منكم برا , تروحله بال3 ورقات الى دبستهم وتطلع فى ايدك شهاده الثانويه بتاعتك و شهادات مؤهل الأب والأم زى ماكتبتهم فى الورق , والكارنيه بتاع كليتك احتياطى لو انت ف أولى كليه
* هايراجع معاك الظابط البيانات الى انت كابتها , وهايعملك علامات صح وكدا , وبعدين يقولك تمام يديك كارت التردد بتاعك ويقولك سلم الورق الى دبسته دا لطالب ف الشرطه قاعد وراكوا , ويقولك تروح وتيجى بكره تختبر القدرات .
* بس ياسيدى بعد ماتسلم الورق دا لطالب الشرطه تروح , وتانى يوم تروح كليه الشرطه علشان تختبر القدرات بتاعتك .
** ـــــــــــــــــــــــــــــــــــــــــــــــ **
(( ثالثـاً )) .. الى انت هاتعمله يوم ماتروح تختبر القدرات
** ـــــــــــــــــــــــــــــــــــــــــــــــ **
ياباشا هاتروح عادى الكليه زى المرتين الى قبل كدا الكليه بتفتح حوالى 7 الصبح , على ماتدخلوا ويجمعوا شيويه منكوا الى داخلين تختبروا , تدخل من البوابه , وتروح ع طول ع المكان الى فيه المدرج الى أشتريت منه ملف الشرطه فى أول يوم لك فيها
وتدخل مدرج تانى على اليمين جنب المدرج الى انت دخلته أول مره
وهايقعدوك مع لجنتك
كـل لجنه مع بعضها
وهاتستنوا شيويه على ما يتجمع عدد كدا من الشباب الى رايح يختبر
بعدين هايجيبوا الورق بتاعك الى انت كنت سلمته امبارح , وهاينادوا اسمك , بعدين هايسلموكوا ورق الأسئله بتاع اختبار القدرات ...
** ـــــــــــــــــــــــــــــــــــــــــــــــ **
((رابعــاً )) .. أسئله اختبار القدرات فى كليه الشرطه باجابتها للسنه دى 2013 والى هاتدخل تلاقيها ان شاء الله
** ـــــــــــــــــــــــــــــــــــــــــــــــ **
طبعاً الجزء المنتظر :D
زى أسئله السمات والى نزلتها الحمد لله من زمان قبل ما الناس تروح تختبر , وبردو أسئله القدرات ومع انى نزلتها قبل كدا من زمان وبعد أول يوم اختبارات فى الشرطه علشان الكل لما يروح يحل ع طول بس كالعاده محدش بيدور ع الصفحه , مافيش اشكال وعلشان كدا بعيد البوست دا تانى علشان اعمله تجميعى للقدرات بأسئلته واجابته
بص الأول ياسيدى الاختبار دا عباره عن نماذج حوالى 3 نماذج حتى الآن
والنموذج بيكون عباره عن ورقه وش وظهر
فيها 50 سؤال حوالى 35 سؤال اختيارى , والباقى أسئله صح وغلط
والأسئله أسئله عامه زى بتاعت سمات الحربيه
هنـا ان شاء الله انا جايبلك أسئله 3 نماذج باجابتها الصحيحه للسنه دى 2013 والى هاتدخل تلاقيها قدامك ان شاء الله
وجايبلك صوره من ورقه الاختبار نفسه والى ممكن لما تروح تلاقيها هى الى ف ايدك :)
والف شكر للرجاله الى بتساعد بعضها ع الصفحه , كانت بتدخل الاختبار الى يعرف يصور الاختبار بيصوره بالموبايل وينزله ع الصفحه او الجروب والى بيعرف يجيب اسئله من الاختبار الى بياخده بينزلها بردو
وياريت الكـل يكون كدا ونفضل نساعد بعض فى المرحله دى
بعد ماتخلص بقى ياسيدى اختبار القدرات تروح ع طول
وتستنى النتيجه تظهر ع النت ع موقع كليه الشرطه الى انت سجلت من عليه
بتدخل عليه وتسجل دخولك برقمك القومى ورقم ملفك
والنتيجه هتاخد فى الغالب من يوم بعد ماتختبر ل 3 ايام علشان ماتقلقش
والمفروض لما تظهر ان شاء الله وباذن الله تكون لائق بيطلعلك ميعاد اختبار الطبى الى هاتروحه
وممكن عادى بتحصل يطلعلك نتيجه القدرات ومايكونش كاتب حاجه عن ميعاد الطبى
ودا بتحصل علشان الموقع ساعات بيهنج , تسيبه عادى وتبقى تشوفه ف وقت تانى هاتظهر
ويظهرلك الميعاد بتاع الطبى بتاعك , وتجهز نفسك بقى للطبى ان شاء الله بعد نجاحك فى القدرات
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
بس كام ملحوظه كدا
الأول لما نزلت قبل كدا أسئله السمات لقيت شيويه بيقولولى حرام عليك انت بتعمل غلط علشان انت كدا بتغشش الناس , سيبهم يدخلوا الامتحان لوحدهم ويحلوه من دماغهم ؟؟؟
وعموما أنـا مش هارد عليهم , كفايه تأكيدى انى نزلت أسئله القدرات كمان ع الصفحه باجابتها , وهاسيب الرد ليكم , انا ينفع الى بعمله انى بنزل أسئله القدرات والسمات بحلها , ولا مش ينفع
والأسئله دى أنا نزلتها قبل كدا من فتره ع الصفحه لكن كانت كل نموذج لوحده , والناس مش بتدور وسألونى تانى عليها ويقولولى والله بندور ومش بنلاقيها , لكن بردو مش مهم قلت انزلها تانى فى موضوع كامل علشان افاده تحصل للشباب الى لسه هايختبر القدرات وطالما فى افاده انا مش هتأخر اعمل اى حاجه :)
الأسئله دى حاول تحفظها بقدر الامكان كلها , علشان ان شاء الله 95 % منها هاتدخل تلاقيها قدامك , فبلاش توقعات بقى واحفظها كلها علشان لما حظك يجى ع نموذج تبقى ضامنه ان شاء الله
وانت بتحفظها ماتحطهاش مذاكره
حطها عى انها معلومات عامه انت بتقراها وهاتستفيد منها علشان تقدر تحفظها ع طول
ولو عاوز تطبعها عندك اطبعها فى ورقه وخدها معاك وانت رايح
بس اياك تتقفش بيها :D
