بسم الله الرحمن الرحيم
تفاصيل الكشف الطبى
الحمد لله جتلك الرساله اللى مكتوب فيها انك نجحت فى السمات واتحددلك معاد الكشف الطبى المهم بتروح فى اليوم المحدد ليك بتقف ف طابور طويل جداّ لحد مايجى دورك وياخدو منك بصمه ايدك وبتروح تقعد تحت مظله كبيره انت واللى معاك كلهم وبيجى واحد يمسك المايك وينادى كل 20 واحد بيبقى معاهم مجند معاه الورق بتاعهم بتدخلو اوضه كبيره فيها دولاب كبير كله بيقلع هدومه وبتفضل بالسلب السبعه الابيض وبيدوك كيسين تلبسهم ف رجلك وبتروحو اول حاجه على الميزان ياخدو طول ووزن اللى جسمهم مش متناسق بيروحو يتعرضو على مستشار وا اللى بيقرر ان كنت هتكمل كشوفات ولا هتروح المهم اللى بيفضلو بيكملو كشوفات اول يوم اللى هيا بقى بتبقى
1-كشف الرمد (بتدخل بيوريق ورق ملون مكتوب فيه رقم عشان يشوف عمى الالوان وبتقعد على كرسى وينقى اصغر صف من الCC ويقولك الفتحه يمن ولا شمال وكدا يعنى لو قلت حاجه غلط بياخد منك كارت التردد بتاعك وكدا تضمن انك ساقط فى الرمد)
2-الاسنان (بتدخل على دكتور الاسنان ويقولك افتح بوقك وعض بس لازم تكون غاسل سنانك عند دكتور)
3-العظام (بتدخل على الدكتور بيقولك اقلع الكيس اللى فى رجلك ويقولك ضم رجلك جنب بعضها واللى عندو تقوس او فلات فوت بياخد اسمه وكدا يضمن بردو انه هيسقط )
4-الجراحه (بتدخلو كلكم مع بعض والدكتور بيخلى وشكم كله للحيط وبتدخلو واحد واحد بيقولك نزل السلب بتنزله من غير تردد وبيمسك البتاع ولو عندك دوالى بياخد اسمك وبعدين بيقولك لف ووطى وافتح رجلك عشان يشوفك كنت عامل البواسير ولا لا يعنى بطلو الافلام عشان تعدو)
5-الجلديه (بتدخل على الدكتور وبيقولك افرد ايدك قدامك وبيشوف الجلد بتاعك واللى ايده بتعرق بيطلع من العياده دى وبيقولك ارفع ايدك لفوق ويشوف جسمك كامل وبعدين بيقولك وطى ويشوف جلدية راسك )
6-الباطنه(بتدخل على دكتور وتنام على سرير ويغزك فى بطنك بايده عشان يشوفك عامل الزايده قبل كدا ولا لا)
7-انف واذن (لازم تغسل ودنك عند دكتور قبل الكشف بيوم وبتروح بيفتح منخيرك ومعاه جهاز كدا بيشوف الجيوب الانفيه بتاعتك وودنك نضيفه ولا لا)
وكدا اليوم الاول خلص بتستنو بقى على مانتيجة العيادات بتدخل الكنترول تترصد ويشوفو انت ساقط فى كام عياده منكم اللى بينجح ف كل العيادات ودا بيقولو تعالى بكره اعمل تحاليل واكشف اجهزه واللى بيبقى ساقط ف عياده واحده بيقولو اطلع اعمل التماس وبتيجى تانى يوم تعيد الكشف ده بس لو نجحت فيه بيقولك تيجى بكره تعمل التحاليل والاجهزه
تانى يوم.
بتروح بنفس طريقة اليوم الاول بس بتدخل تعمل اشعة صدر
وبعدين بتخش ع الموجات فوق الصوتيه (السونار)
وبعدين قاع العين بيحطلك قطره بتوسع قاع العين وبتعميك موقتاّ وبتدخل ع الدكتور بيشوفك بجهاز كد بيكشف لو كنت عامل عمليه ف عينك قبل كدا ولا لا وبعدين رسم القلب ولازم متكونش متوتر خالص عشان تنجح فيه وبعدين بتروح المعمل ياخدو منك عينة دم وبول (مفيش التماسات ف اليوم التانى غير فى قاع العين ولازم اليوم ده تكون صايم من بليل عشان التحاليل وبعدين بيقولك تعالى بكره خد نتيجة التحاليل)
اليوم التالت
بتروح تشوف نتيجة التحاليل الساعه 12 الظهر وبينادو اللى ساقطين الاول وبعدين بيجى مندوب من الكليه الجويه ينادى شوية اسماء تروح تكشف جويه فى يوم هيحددهولك ودول اللى بيبقى نظرهم 6/6 ودول طبعاّ ناجحين ميه ف الميه والباقين اللى مترشحوش جويه ناجحين بردو وبيتحددلهم اليوم الرياضى بعدها بيوم او اتنين بالكتير بس كدا
